… duat mi' wer verlass'n … (Duett)

1. Duat mi' wer verlass'n,
kann i des schlecht ertrag'n,
spür' an Druck, an Wehdam
und a Würg'n im Mag'n …
[: Hab' dazua an Knöd'l
a no lieg'n im Hals,
duat mi' wer verlass'n,
leid' i jed'nfalls!:]

2. Wann a Viecherl geh' muass,
weil sei' Zeit is um,
häng' i ned vui anders,
ned vui besser 'rum …
[: Spür' den gleich'n Knöd'l
stecka in mei'm Hals,
wann a Viecherl geh' muass,
leid' i jed'nfalls! :]

3. Wann a Baam mir hiwerd,
den i 'mal hab' g'setzt,
geht ma des recht nach a,
fuih' i mi' verletzt …
[: Wieder schafft der Knöd'l
mir an Druck im Hals,
wann a Baam mir hiwerd,
leid' i jed'nfalls! :]

4. Gestern san zwoa wegzog'n
aus meiner Nachbarschaft …
I muass wirkli' zuageb'n:
De hätt'n mi' boid g'schafft …
[: Hab'n mit ean'rer Bosheit
g'stohl'n vui Leb'nsfreid …
mein Gott, jetzt san 's furtzog'n,
… 's duat ma koa bisserl leid! :]

[: Spür' koan Druck, koan Wehdam,
koa Würg'n ned d'rin im Mag'n,
so a Art „Verlass'nwerd'n“
kann i - scheint 's guat – vertrag'n! :]

So a Art „Verlass'nwerd'n“
kann sogar i vertrag'n!