Mitt'n d'rin

Scho
z'alt sei zum Jungsei
aber
sauber z'jung sei
zum Altsei …
und
spür'n müass'n
im herg'schundna Hirn,
wia 's Jungsei und 's Altsei
um d' Wett dean laffa,
wia s' – koana möcht halt nachgeb'n -
mitanander schwar raffa …

Scho
z'krank sei zum G'sundsei
aber
no z'gsund sei
zum Aufgeb'n
und
spür'n müass'n,
dass ma an Körper hat,
dass g'wiss
des G'sundsei gar ned so selbstverständlich is …
und
a G'fui erfahr'n müass'n,
an des ma oiwe öfter jetzt denkt:
Jed'n Tag erfahr'n müass'n …
na ja …
als eig'ntlich „g'schenkt“!

Scho
vui z'traurig sei zum Frohsei
aber
no z'froh sei
zum Aufgeb'n
und
spür'n müass'n,
dass tiaf in oam d'rin …
mit oam selba …
mit de andern …
und
um oan rum …
scho bald 's mehra ned so klappt hat,
wia ma 's erhofft si' halt g'habt hat,
dass ma aber
trotzdem no z'fried'n sei kannt
(wenn ma 's kannt!).
… Dass ma si' oft
an an Strohhalm klammert,
dann aber merkt,
ganz sachlich,
ohne dass ma jammert,
dass eig'ntlich all's beim Alt'n blieb'n is,
dass a 's Neue
oiwe da selbe Krampf
und eig'ntlich nix Neu's is …

Warum schind'st oan bloß so her…
… du Midlife-Crisis … ?!