Hundsaug'n

In d'Hundsaug'n
von mei'm Hund
neiz'schaug'n
duat ma taug'n.

… Wia de oan ned bloß oschaug'n,
sondern aus'm Hund rausschaug'n …
… wia de neugierig sei könna
und betteln,
ja fordern sogar …
da …
kummt 's ma oft vor -
i dua 's halt so spür'n -
als dat'n de Aug'n rausglanga zu mir …
… als möcht'n s' mi berühr'n …
… so ganz anders …
wia de kalt'n Froschaug'n,
mit dene d'Leit mi oft oschaug'n …

De Wärm',
de aus dene Hundsaug'n
ko rausschaug'n,
de …
de wirft mi fast um!
… 's werd scho so sei,
zum Falschsei
is mei Wauggerl halt z'dumm … ?

… Nur oans …
dat ma no mehra taug'n
als in solchene Aug'n
bloß einez'schaug'n:
vui
z'gern dat i halt a amoi
aus solchene aufrichtig'n Aug'n
voller G'fui
selber
nausschaug'n!