Im Untergrund

Des Eineschaug'n ins Aquarium
is a pfundige Sach!
Des is a der Grund,
warum i 's gern' mach'.

Da Schmetterlingsfisch
bleibt oiwe ob'n,
de Neonfischerl – zu dritt -
schwimma mehra in da Mitt',
und de Dornaug'n
- sche bunt -
bleib'n liaber weiter
unt'n
am Grund.

… G'rad wia im Leb'n …
wo 's as halt a duat geb'n,
dass de oana oiwe ob'n san
und de ander'n
dafür
mehra unt'.

Da …
wenn jetzad i a
a Fischerl da drinna war' …
… moan i …
war'n oft ganz schee verschund'n
meine Grät'n, meine Boana,
denn de mehran Stund'n
war' mei Platzerl
bestimmt
tiaf drunt'n
unter
de Stoana …