Wann i mal g'scheit woana möcht
- auf Kommando geht 's halt schlecht -
brauch' i g'rad de Fotos da
an meine Wänd' o'schaug'n …
… Buid'l san 's von meine Leit,
aufg'nomma vor g'raumer Zeit …
[: … und scho' glänz'n feucht mir meine Aug'n …:]
1. Sovui Liabe san scho ganga,
für mi nimma zum Daglanga,
g'rad, dass i no d'Buid'l o'schaug'n ko.
Dankbar dearf i an sie denka,
eana a „Vergelt 's Gott“ schenka,
doch de Zeit mit eana is davo!
R: Wann i mal …
2. Herzig, wia de Kloana lacha … … …
… schlimm is 's, was sie heut' oft macha:
eana bisserl Glück mit Hax'n tret'n …
Was i rat', so liab und ehrlich,
halt'n s' g'radwegs für entbehrlich,
kunnt i a mit Eng'lszunga red'n …
R: Wann i mal …
3. Auf am Hochzeitsbuid'l nacha
siech i zwoa so glücklich lacha,
dass 's ma richtig leicht werd in da Brust!
… Dabei hätt' i glatt vergess'n,
d' Scheidung is erst neili' g'wes'n …
wieder is er da, der traurig' Frust!
R: Wann i mal …
4. Zum Glück hab'n ma Wechs'lrahma,
da is 's halb so schlimm, des Drama,
weil ma de ja wieder braucha ko …
werd ma a Buid vom Wend'lstoa
statt 'm Hochzeitsbuid'l einedoa,
[: zuverlässig – moan i – war' der scho! :]
Wann i glücklich sei' mal möcht
- auf Kommando geht’s halt schlecht -
brauch' i g'rad DES FOTO DA
an meiner Wand o'schaug'n …
… DES BUID'L DA VOM WEND'LSTOA
brauch' i wohl nimma aussedoa,
i spür' an neua Glanz in meine Aug'n!
… DES BUID'L DA VOM WEND'LSTOA
lasst mi mei Lebtag ned alloa,
[:i spür' an neua Glanz in meine Aug'n! :]
Text und Weise entstanden vom 30. Juni bis zum 3. Juli 2011